A History of the Inquisition of the Middle Ages; volume III

Johannes episcopus servus servorum Dei venerabilibus fratribus archiepiscopo tholosano ejusque suffraganeis et dilecto filio inquisitori hæreticæ pravitatis in regno Franciæ per sedem apostolicam depututo, Tholosæ residenti, salutem et apostolicam benedictionem. Dudum venerabilis frater noster Guillelmus episcopus Sabinensis scripsit tibi, fili inquisitor, de mandato nostro per suas litteras in hac forma: Guillelmus miseratione divina episcopus Sabinensis religioso viro inquisitori hæreticæ pravitatis in partibus tholosanis salutem in Domino sempiternam. Sanctissimus pater noster et dominus, dominus Johannes divina providentia papa vicesimus secundus optans ferventer maleficos infectores gregis Dominici effugare de medio domus Dei, vult, ordinat, vobisque committit quod auctoritate sua contra eos qui dæmonibus immolant vel ipsos adorant aut homagium ipsis faciant, dando eis in signum cartam scriptam seu aliud quodcumque; vel qui expressa pacta obligatoria faciunt cum eisdem, aut qui operantur vel operari procurant quamcumque imaginem vel quodcumque aliud ad dæmonem alligandum seu cum dæmonum invocatione ad quodcumque maleficium perpetrandum, aut qui sacramento baptismatis abutendo imaginem de cera seu re alia factam baptizant, sive faciunt baptizare, seu alias cum invocatione dæmonum ipsam fabricant quomodolibet, aut faciunt fabricari, aut si scienter baptismus seu ordo vel confirmatio iterantur.

Item de sortilegis et maleficis qui sacramento eucharistiæ seu hostia consecrata necnon et aliis sacramentis ecclesiæ, seu ipsorum aliquo, quoad eorum formam vel materiam utendo eis in suis sortilegiis seu maleficiis abutuntur, possitis inquirere et alias procedere contra ipsos, modis tamen servatis qui de procedendo cum prælatis in facto heresis vobis a canonibus sunt præfixi. Ipse namque dominus noster præfatus potestatem inquisitoribus datam a jure quoad Inquisitionis officium contra hæreticos, necnon et privilegia, ad prætactos casus omnes et singulos ex certa scientia ampliat et extendit quoadusque duxerit revocandum. Nos itaque præmissa omnia vobis significamus per has nostras patentes litteras de præfati Domini nostri Papæ speciali mandato facto nobis ab ipso oraculo vivæ vocis. Datum Avenione die vicesima secunda mensis Augusti anno Domini MCCC vicesimo, pontificatus prædicti Domini Papæ anno quarto.

Sane noviter intellecto quod errores et abominationes in eisdem litteris comprehensi in partibus illis, de quibus in litteris ipsis habetur mentio, adhuc vigent, nos cupientes super ipsis, ne deinceps pullulent, plenius providere, discretioni vestræ præsentium tenore committimus et mandamus quatinus omnes inquisitiones quas auctoritate litterarum hujusmodi, vos, fratres Archiepiscope et suffraganei, prout quemlibet vestrum tangit, et tu inquisitor præfate, cum singulis eorumdem insimul, vel tu inquisitor solus per teipsum inchoastis, si completæ non fuerint, vos, Archiepiscope et suffraganei, quilibet vestrum videlicet in sua diocesi per se vel alium, quem ad huc deputandum duxeritis, et tu inquisitor prædicte, insimul celeriter compleatis; quas postquam compleveritis una cum illis quæ jam per te solum, præfate inquisitor, forsitan sunt completæ, nobis sub vestris sigillis fideliter interclusas quanto citius poteritis transmittatis, ut eis visis quid faciendum sit tam super illis de quibus fuerit inquisitum, quam super omnibus cæteris de quibus nondum est inceptum inquiri, plenius et certius, auctore Domino, disponamus. Tu vero, inquisitor prædicte, super illis de quibus adhuc inquirere non cœpisti prætextu dictarum litterarum, nisi forsan aliud a nobis receperis in mandatis, te nullatenus intromittas. Per hæc autem non intendimus vobis vel vestrum alicui, quantum ad illa quæ a jure vobis alias sunt permissa, in aliquibus derogari. Datum Avinione secundo Nonas Novembris, pontificatus nostri anno decimo quinto (Nov. 4, 1330).